خصائص الخشب الميكانيكية ومعرفتها تمكننا من تحديد وقياس حركة الخشب بدقة وبالتالي يمكن تفادي أي مشكلة لحركة الخشب
أولا يجب حفظ هذه المصطلحات واختصاراتها :
يمكن قياس محتوى الرطوبة لأي لوح خشب بكل سهولة بإستخدام مقياس الرطوبة وحساب كم بوصة/سم سيتحرك الخشب وبالتالي قرار إستخدام هذا اللوح من عدمه.
أغلب نجارين التشطيبات عارفين إن التغيرات الموسمية للرطوبة تسبب حركة خشب اﻷرضيات و اﻷبواب و اﻷثاث .. إلخ ، حيث تتمدد مع الحرارة في الصيف و تنكمش مع البرودة في الشتاء لكن القليل جدا يعلم أن مقدار الحركة المتوقع سهل تحديده بدقة.
الخشب هيتحرك .. هايتحرك .. ماتحاولش!
الخشب مخلوق هيجروسكوبي يعني يقدر يمتص ويطرد جزيئات المياه من و إلي البيئة المحيطة و بالتالي محتواه من الرطوبة يتأرجح حسب الرطوبة النسبية المحيطة.
التناسب طردي حيث تزيد الـ (MC) لما ال (RH) تزيد فيتمدد الخشب و العكس فينكمش إلى أن يصل لحالة من اﻹستقرار/التعادل/التشبع المسماة EMC فيثبت حجمه.
ما هى حالة اﻹستقرار؟
لو الخشب اللي هتشتغل لسه منقول من مكان بعيد لازم تعرف محتوى رطوبته قبل التشغيل و من أي خشبة قديمة عندك بالقياس و من نسبة الرطوبة النسبية في مدينتك من النشرة الجوية او مواقع النت زي ده دخل إسم مدينتك هنا هتعرف امتى هيوصل لحالة اﻹستقرار دي.
في قاعدة من دهب خليك دايما فاكرها .. في المتوسط .. كل 4% تغير في محتوى الرطوبة يقابله تقريبا 1% تغير في حجم اللوح.
خليك فاكر كويس القاعدة البسيطة دي!
مثال: اشتريت لوح عرضه 40 بوصة /100 سم رطوبته 9% تعرض لرطوبة نسبية في جو ورشتك 25% ايه اللي هايحصل ؟
عشان يتعادل و يوصل للاستقرار هيتخلص من حوالي 4% من محتواه من الرطوبة للجو المحيط و بالتالي هيكش .. كام .. قلنا لكل 4% تغير يقابله 1% تغير في الحجم يعني 1% انكماش من 100سم عرض اللوح = 1 سم.
مثال 2: نفس اللوح بس رطوبته 13% والجو عندك 25% .. يعني الاستقرار بيحصل عند 5% .. إذا رطوبة اللوح هتقل 8% يعني هينكمش 2% يعني 2 سم .. و هكذا
و بناءا عليه لو اشتغلت علي ألواح رطبة جدا و الجو في مدينتك/بيتك جاف تأكد تماما إنه هينكمش في المنتج النهائي .. يعوج .. يتشقق .. باب يفتل .. ضرفة تفك ..
العوامل المساعدة لقياس حركة الخشب بدقة
1 - عرض لوح الخشب
الخشب بيتخن/يعرض/يسمن/يتحرك بالعرض مش بالطول ( ألياف الخشب شبه المواسير الطرية جنب بعضها )
كلمة لوح كمصطلح يطلق على أي قطعة سمكها أقل من بوصة و نصف تقريبا 4سم.
طبيعي إن لوح بعرض 8 بوصة/20 سم تتحرك ضعف لوح عرضه 4 بوصة/10 سم و اللوح اللي عرضه 12 بوصة/30 سم بيتحرك 3 أضعاف لوح 4 بوصة/10 سم .. و هكذا حتى لو لوحين متغريين يعاملوا معاملة لوح واحد فقط كأنهم قطعة واحدة بالضبط وطبعا لو القطعة سمكها أكبر يبقي الحركة هتكون أفقية و رأسية مع بعض..
2 - إتجاه اﻷلياف (السمرة)
اﻷلواح تأتي مقطوعة من اﻷشجار إما قطع عرضي flat-sawn يكون اتجاه ألياف الحلقات السنوية ما بين 0 و 45 درجة أو قطع ربعي Quarter-sawn بالمسمى اﻷمريكي / أو قطع صدعي-نشري Rift-sawn و أيضا عمودي اﻷلياف Vertical grains cut وهم مسميات أوروبية حيث تكون زاوية ألياف الحلقات السنوية بين 45 - 90 درجة ، و النوع الثاني أفضل كثيرا حيث يتمدد وينكمش نصف مقدار حركة النوع اﻷول على الأكثر.
و لكن إلي أن يثبت تماما و 100% يتأكد لديك إنك شغال علي لوح ربعي القطاع يجب أن تتعامل وتحسب الحركة على أساس أنه من النوع اﻷول.
3- محتوى رطوبة الخشب MC عند الشراء:
الطريقة الوحيدة لمعرفة كيف يتحرك الخشب هي بقياسها باستخدام عداد رطوبة Moisture-meter و عدم القيام بذلك معناه استحالة قدرتك علي توقع حركة الخشب ولو كانت نسبتها خارج الحدود المسموحة للتشغيل عليك برفضها و شراء ألواح أخري في الحدود المقبولة.
4- الرطوبة النسبية RH داخل وخارج المباني:
أغلب المنازل في مصر تفتقد أنظمة للتحكم في الرطوبة مثل الموجودة في التكييفات أو المستقلة و غالبا بتعاني من تقلبات حادة في الRH تقريبا من 25% حتى 65% و المدي ده يتسبب في تغير حوالي 6-7% من محتوى الرطوبة MC و بالتالي يتسبب إن لوح من الزان بعرض 12 بوصة/ 30 سم إنه يتحرك حوالي 1/4 بوصة/6 مم.
ملحوظة : اﻷخشاب المصنعة زي البلاي وود و البانوه و الMDF بتتحرك أيضا لكن حوالي 1/10 حركة اﻷخشاب الطبيعية.
في حين أن رطوبة الجو النسبية RH خارج المباني في القاهرة مثلا تتعدى 80-90% في الشتاء فلو اشتغلت على لوح ال MC بتاعته 6-8% مثلا عشان يتعادل و يوصل لحالة اﻹستقرار يسحب الرطوبة من الجو و تزيد الMC حوالي 12% يعني يقابلها حوالي 3% زيادة في عرض اللوح طبقا للقاعدة العامة اللي قولناها .. كل 4% من MC يقابلها 1% حجم.
يعني لوح الزان ال 30سم هيبقي 30.9سم عند وصوله لحالة التعادل EMC بعد شهر أو شهور.
5- نوع فصيلة الخشب:
اﻷخشاب اللينة تتحرك أقل من اﻷخشاب الصلبة لو في لوح من البياض هيتحرك 1/8 بوصة/3 مم بنفس الحجم و اتجاه اﻷلياف من لوح خشب زان هيتحرك 1/4 بوصة/6مم في نفس الفترة الزمنية يعني الضعف.
المعادلة المرتبطة بأنواع الخشب المختلفة رغم كونها دقيقة جدااا فهي معقدة و مملة جدا ﻷقصي درجة عشان تحسبها بنفسك لكن خليك دايما فاكر قاعدة بسيطة ال 4% محتوى رطوبة على طول قصاده 1% تغير في الحجم
6- الفينيش بكل أنواعه ورنيش بس ولا سيلر .. لاكيه .. استر جمالكة واكس ... إلخ .. لا .. لا .. لا يوقف حركة الخشب وإنما يبطأها فقط و ان لم تكن ملحوظة بالعين و في الآخر لازم يوصل لحالة اﻹستقرار EMC.
* ملحوظات عامة:
كل ما تشتري خشب احتفظ بسجل لل MC بتاعته عند الاستلام في الورشة عشان لو حصلت مشكلة بعد كده عند العميل في أي مكان أو منطقة تانية هاتعرف هايتحرك قد ايه نهائيا وممكن تنقص أو تزيد سلخات صغيرة حسب الحاجة و تصلح الشغل.
في مصر .. القراءات اﻷفضل لخشب التشغيل عموما في حدود 12-14% ، لو ورشتك في اسكندرية و هتسلم شغل في أسيوط مثلا زود عرض اللوح عشان هيكش بسبب الجو اﻷكثر جفافا و العكس.
لو الخشب جاف جدا مثلا 6% و متخزن و ناوي تعمل بيه حاجة في شارع أو جنينة outdoor يعني؛ اعرف انه هيسحب رطوبة و يتمدد .. اعمل حسابك.
لو مخزن خشب في مكان رطب جدا و الحيطان ناشعة ممكن يسحب من 10-12% رطوبة MC فرجاءا قبل التشغيل بفترة تنقله مكان مشابه للمكان النهائي و يكون دافئ قد المستطاع و تقيسه كل فترة لحد مايجهز و يستقر.
أبواب الشقق و الشبابيك تعامل انها خارجية outdoor يعني غالبا هتسحب رطوبة فتمدد مستقبلا راعي ده و حاول أثناء التشغيل انك تخلي اﻷلياف اﻷقرب لكونها متوازية لبعضها و عمودية تكون ناحية خارج الشقة و اﻷكثر ميلا على بعضها تكون للداخل.
أبواب ضرف المطابخ و الكبائن عموما ذات الحشوة الداخلية من أخشاب طبيعية غير مصنعة لا تلصق الحشوة ولا تغري الحشوة سيبها حرة في مجرياتها تتحرك براحتها مع فصول السنة مع حساب خلوص كام مللي داخل المجرة .. ماتضيقهاش و لا تعمقها أوي.
اﻷبواب المقببة احسنلك ماتعملهاش تجنبها نفس القصة في بعض قرص الترابيزات لان حسب فصول السنة اﻷلواح الطولية هتتحرك بالعرض في حين أن العوارض الرفيعة هتفضل ثابتة فهيقوس للداخل مع اﻹنكماش أو للخارج مع التمدد.
المقالة من جروب كلام نجارين بقلم أ/حاتم معروف.
